„Hvað ef þetta væri þitt barn á hjólinu? Eða barnabarn?“

„Ég var næstum því drepin í kvöld. Vopnið var 18 hjóla trukkur sem keyrði viljandi í veg fyrir mig á Strandgötunni í Hafnarfirði og það er ekki honum að þakka að sonur minn á ennþá móður á lífi,“ segir Kristín Laufey Steinadóttir í Facebook-færslu sinni sem fengið hefur töluverða athygli eftir að Kristín sendi hana frá sér í gær.

„Ég er búin að fara í gegnum allan tilfinningaskalann í kvöld, vera reið, hrædd, fegin að ekki fór verr en ég bara get ekki setið á mér að skrifa um þetta. Ég velti fyrir mér að senda inn kæru en ég var í svo miklu sjokki eftir þetta að ég aulaðist ekki til að taka niður númerið. Enda væri það sennilega ekki til neins.“

Málsatvik voru þau að Kristín var á 35 kílómetra hraða þegar bílstjóri trukksins ákvað að aka flutningabíl sínum úr kyrrstöðu af bílastæði þvert inn á veginn eftir að hann hafði horfst í augu við hana. „Ég þurfti auðvitað að snarbremsa og hjólið hentist til í loftinu og yfir á hina akreinina þar sem betur fer var smá fjarlægð í bílinn sem kom á móti og ég bara skil ekki ennþá hvernig mér tókst að hanga á hjólinu,“ segir Kristín og bætir við að bílstjórinn hafi brugðist ókvæða við.

„Til að toppa þetta þá sendi bílstjórinn mér fingurinn og öskraði á mig að vera á gangstéttinni þegar ég öskraði á hann að passa sig og hvort að hann væri að reyna að drepa mig. Ég var alveg miður mín, með tárin í augunum og skjálfandi þegar ég kláraði þennan stutta kafla heim.“

Kristínu er spurn hvað vaki fyrir bílstjórum sem þessum. Hún kallar eftir auknum skilningi ökumanna og að þeir sýni meiri tillitsemi gagnvart hjólreiðamönnum í umferðinni, enda séu þeir jafnréttháir ökumönnum.

„En það tekur kannski mörg ár að fá alla ökumenn til að skilja það, því miður. Og þangað til, þá óttast ég mest að hér eigi eftir að vera banaslys þar sem einhverjir þessara ökumanna "sýna hjólreiðamönnunum í tvo heimana" og aka á eða í veg fyrir þá, það eru mörg tilvik þar sem það hefur ekki mátt miklu muna,“ segir Kristín áhyggjufull.

Hún óskar þess að ökumenn líti í eigin barm áður en þeir fyrirhuga að haga sér eins og ökumaðurinn í hennar tilfelli.

„Hvað ef þetta væri þitt barn á hjólinu? Eða barnabarn?“ spyr Kristín. „Myndir þú hafa hegðað þér á nákvæmlega sama hátt? Ef barnið þitt ákveður að æfa hjólreiðar, myndir þú vera sáttur við að aðrir bílstjórar legðu líf þess og limi í hættu til að koma sínu máli á framfæri, sjálfir vel varðir í sinni blikkdós?“

Kristín leggur til að allir hafi gullnu regluna að leiðarljósi, nauðsynlegt sé að koma fram við aðra eins og þú vilt að aðrir komi fram við þig því þá væri heimurinn betri staður.

„Þetta þarf ekki að vera flókið. Bara að anda aðeins rólega, hugsa með sér - í dag ætla ég að gera mitt allra besta til að vera góð og tillitssöm manneskja.“

Færsluna í heild sinni má sjá hér að neðan

Post by Kristín Laufey Steinadóttir.