Banna Íslandsbanka að beita ákvæði um endurskoðun vaxta

Neytendastofa hefur bannað Íslandsbanka að beita ákvæði um endurskoðun vaxta vegna fasteignaláns sem tekið var á árinu 2005.

Sigurður Freyr Magnússon tók sex milljóna króna verðtryggt lán með 4,15 prósent vöxtum hjá Íslandsbanka, í ágúst 2005. Í skilmálum lánsins, eins og mörgum fleirum, var kveðið á um að bankinn gæti breytt vöxtum að fimm árum liðnum. Ef Sigurður felldi sig ekki við slíka ákvörðun gæti hann greitt upp lánið.

Í fyrra fékk Sigurður tilkynningu frá Íslandsbanka um að vextirnir myndu hækka í 4,85 prósent. „Ég gerði ráð fyrir því þegar ég tók lánið að ef vextir myndu lækka á markaði að þá fengi maður lægri vexti en því var ekki að heilsa,“ segir Sigurður.

Sigurður kvartaði til Neytendastofu. Hann benti meðal annars á að ekki hafi verið skilgreint með hvaða hætti vextir væru breytilegir og við hvaða aðstæður þeir breyttust.

„Ef menn eru með svona opin ákvæði sem vísa í engu til þess hvað ræður vöxtunum held ég að það geti ekki staðist nokkra skoðun,“ segir Sigurður og Neytendastofa er sammála honum.

„Í skilmálum þess skuldabréfs sem hér er til álita eru engar upplýsingar gefnar um það til hvaða þátta sé litið við vaxtaákvörðun eða við hvaða aðstæður vextir breytist,“ segir Neytendastofa sem kveður þetta stangast á við á lög og bannar bankanum að beita þessu ákvæði. Engu skipti þótt borga mætti upp lánið án uppgreiðslugjalds.

„Við erum að fara yfir úrskurðinn í bankanum og tjáum okkur ekki að svo stöddu,“ segir Guðný Helga Herbertsdóttir, upplýsingafulltrúi Íslandsbanka. Ekki fékkst upplýst hversu mörg lán ákvörðun Neytendastofu gæti haft fordæmisgildi fyrir. Ekki er ljóst hvort bankinn vísar málinu til Áfrýjunarnefndar Neytendamála.

„Ég tel að Neytendastofa sé þarna að taka ákvörðun af ákveðnu hugrekki ef þessi skilmálar hafa verið útfærði með sambærilegum hætti víða,“ segir Sigurður.

Nefna má að Íslandsbanki vísaði til þess í málinu að um væri að ræða samskonar vaxtaendurskoðunarákvæði hjá bankanum og tíðkist hjá Íbúðalánasjóði.