Farþegar skemmtiferðaskipa yfir 100 þúsund á næsta ári

Hafnastjóri Faxaflóahafna spáir því að fjöldi ferðamanna með skemmtiferðaskipum fari í fyrsta sinn yfir 100 þúsund á næsta ári. Nú þegar er búið að bóka um 90 skip hingað til lands á næsta ári. Komur skemmtiferðaskipa til Íslands dreifist á lengra tímabil en áður.

Nokkur fjölgun hefur orðið í komu skemmtiferðaskipa hingað til lands. Tvö skemmtiferðaskip leggjast að bryggju í Sundahöfn í dag en alls taka Faxaflóahafnir á móti 19 skipum í júlímánuði. Gísli Gíslason, hafarstjóri Faxaflóahafna, segir stöðuga fjölgun skemmtiferðaskipa til landsins. Hann telur fjölgun í komum skemmtiferðaskipa til Íslands liggja í góðri markaðssetningu.

Ferðaþjónustan hefur tekið fram úr sjávarútvegi í gjaldeyrisöflun og er spáð því að yfir milljón ferðamenn komi hingað til lands árið 2015. Skemmtiferðaskip skila talsverðum tekjum í ríkissjóð í formi tollgreiðslna og vitagjalda. Verslun og þjónusta nýtur einnig góðs af fjölgun ferðamanna á skemmtiferðaskipum.