Hefur Gunnleifur leikið sinn síðasta landsleik?

Gunnleifur Gunnleifsson er ekki lengur í hópi þriggja bestu markvarða landsins því Lars Lagerbäck og Heimir Hallgrímsson völdu þennan 39 ára markvörð Breiðabliks ekki í landsliðshóp sinn fyrir leiki gegn Belgíu og Tékklandi í næstu viku.

Heimir og Lars völdu frekar Ingvar Jónsson, markvörð Stjörnunnar, og Ögmund Kristinsson, markvörð Randers í Danmörku. Ingvar hefur verið í hópnum í síðustu leikjum en á enn eftir að spila landsleik. Ögmundur kom inn á á móti Eistlandi í júní en hafði ekki verið í hópnum síðan.

Gunnleifur Gunnleifsson hefur verið fastamaður í hópnum síðan Lars Lagerbäck tók við liðinu í ársbyrjun 2012 og alls verið í hópnum í 25 af 27 leikjum. Gunnleifur hefur hins vegar ekki tekið þátt í nema fimm þeirra og hann hefur ekki spilað keppnisleik frá árinu 2010.

Gunnleifur er fimmti leikreyndasti markvörður karlalandsliðsins frá upphafi með 26 leiki en Hannes Þór Halldórsson, aðalmarkvörður íslenska liðsins, er kominn með 24 landsleiki og er líklegur til að taka fljótlega fimmta sætið af þeim Gunnleifi og Friðriki Friðrikssyni.

„Við erum alls ekki ósáttir við Gunnleif. Hann bankar á og heldur þeim við efnið. Við sjáum svo hvað gerist í næsta verkefni,“ sagði Heimir Hallgrímsson, annar þjálfara Íslands, í gær.

Gunnleifur lék þrjá fyrstu landsleiki sína á árunum 2000 og 2001 en síðan var hann ekki með í landsliðinu fyrr en árið 2008 þegar hann var á 33. aldursári. Gunnleifur var síðan aðalmarkvörður landsliðsins frá 2009 til 2010. Nú er hins vegar óvíst hvort hann verður aftur með en það styttist í fertugsafmælið hans þegar liðið mætir Kasökum í lok mars.