Aldrei gott að tapa

Landsliðshópur Íslands fyrir leikina gegn Belgíu og Tékklandi í næstu viku var tilkynntur í gær. Fátt kom á óvart í liðsvali þeirra Lars Lagerbäck og Heimis Hallgrímssonar en einn nýliði er í hópnum – Hörður Björgvin Magnússon sem leikur með Cesena í ítölsku úrvalsdeildinni.

Lagerbäck á sem kunnugt er langan feril að baki sem landsliðsþjálfari en segir að þetta sé í fyrsta sinn sem lið hans leiki æfingaleik svo skömmu fyrir mótsleik líkt og Ísland gerir nú. Strákarnir mæta Belgum í vináttulandsleik í Brussel á miðvikudag en Tékklandi í undankeppni EM 2016 fjórum dögum síðar. Sá leikur fer fram í Plzen og er toppleikur A-riðils í undankeppninni þar sem bæði lið eru með fullt hús stiga eftir þrjár umferðir.

„Við munum ekki ákveða fyrr en eftir helgina hverjir spila gegn Belgíu. Það ræðst af ástandi leikmanna eftir leiki helgarinnar en hugmyndin er að gefa leikmönnum sem hafa lítið fengið að spila tækifæri í byrjunarliðinu og gera jafnvel 3-4 breytingar í hálfleik. En það er erfitt að meta það nú hver niðurstaðan verður,“ sagði Lagerbäck við Fréttablaðið í gær.

Lærum mest að spila við góð lið

Strákarnir eru á mikilli siglingu eftir sigrana þrjá í undankeppninni í haust og ekki síst glæstan 2-0 sigur á Hollandi á Laugardalsvellinum. Ljóst er að andstæðingurinn á miðvikudaginn verður ekki af lakari endanum en Belgía hefur á að skipa gríðarlega öflugum leikmannahópi en liðið er nú í fjórða sæti styrkleikalista FIFA og er þar næstefsta Evrópuþjóðin.

„Ég tel að við lærum mest af því að spila við sterkar þjóðir,“ segir hann og kveðst ekki óttast afleiðingarnar þótt úrslitin í leiknum verði íslenska liðinu óhagstæð.

„Það fer ef til vill fremur eftir frammistöðunni í leiknum heldur en niðurstöðunni. Neikvæð úrslit gætu þess vegna hvatt menn til dáða og fengið þá til að vilja sanna sig í næsta leik. Það er þó aldrei gott að tapa og sérstaklega ef það bitnar á einstökum leikmönnum. Það er heldur ekki gott að tapa með miklum mun en ég hef almennt ekki áhyggjur af því.“

Hann segir að þjálfararnir hafi ekki íhugað að taka með sér fleiri leikmenn til Belgíu til þess að gefa fleiri leikmönnum tækifæri til að sýna sig og sanna.

„Mér finnst þessi blanda af 20 útileikmönnum og þremur markvörðum vera góð og henta æfingunum vel. Ef það eru fleiri leikmenn þarf að taka einhverja á séræfingar og annað slíkt. Ef allir leikmenn eru heilir, líkt og tilfellið er nú, er best að vera með 23 leikmenn í hópnum.“