Neyðarkallinn nú með línubyssu

Níunda árið í röð selja nú um helgina sjálfboðaliðar Neyðarkall björgunarsveitanna. Í ár er Neyðarkallinn með línubyssu.

Í tilkynningu Landsbjargar er vísað til þess að í bókinni Mannslíf í húfi, sögu Slysavarnafélags Íslands, komi fram að á þeim rúmu 85 árum sem Slysavarnafélagið Landsbjörg og forverar þess hafi starfað hafi nálægt 2.500 manns verið bjargað með fluglínutækjum þess af erlendum sem innlendum skipum sem strandað hafi hér við land.

„Fyrsta slíka björgunin var í mars 1931, tæpum fimm mánuðum eftir að slysavarnadeildin Þorbjörn í Grindavík var stofnuð og aðeins viku eftir að heimamenn höfðu fengið tilsögn í meðferð fluglínutækja,“ segir í tilkynningu Landsbjargar.