Innlent

Reynt að tæla börn: Þrjú kynferðisbrot á jafnmörgum árum

Hanna Ólafsdóttir skrifar
Lögreglan flokkar tilkynningar um tælingar í þrjá flokka eftir alvarleika þeirra.
Lögreglan flokkar tilkynningar um tælingar í þrjá flokka eftir alvarleika þeirra. Vísir/Vilhelm
Tilkynningar til lögreglunnar vegna tælingar eða annars grunsamlegs háttalags ókunnra gagnvart börnum voru alls 239 á 30 mánaða tímabili frá 1. janúar 2011 til 30. júní 2013.

Í 62 málum hafði meintur gerandi ekki reynt að fá barnið með sér, því var boðið sælgæti, það upplifði sig elt eða bent eðaveifað var í áttina til þess. Í 37 málum fundust fullnægjandi skýringar á málunum, afar að sækja börn, bílum lagt við skóla vegna vinnu eða frásagnir barna sem reyndust svo uppspuni . Eftir standa 140 tilkynningar sem skilgreina má sem hugsanleg tælingarmál, það er mál þar sem fullorðinn, ókunnugur einstaklingur reyndi að nálgast börn eða ungmenni á einhvern máta.

Í skýrslu lögreglunnar um tælingarmál á sama tímabili kemur fram að í þremur málanna voru börn tekin, farið með þau í burtu og brotið á þeim kynferðislega.  Tvö brotanna, sem bæði áttu sér stað á þessu ári, eru upplýst en í því þriðja, sem er frá árinu 2012 en var rannsakað 2013, er gerandi óþekktur, en málið kom ekki til kasta lögreglu fyrr en mörgum mánuðum eftir atvikið.

Friðrik Smári Björgvinsson yfirlögregluþjónn segir lögregluna taka allar slíkar tilkynningar alvarlega og að oft sé mikil vinna lögð í slík mál þó oft sé eftir litlu að fara. „Öllum þessum tilkynningum er fylgt eftir. Við tölum við börnin og foreldrana og reynt er að komast eins langt í málinu og hægt er. Oft eru eðlilegar skýringar en það er betra að tilkynna oftar heldur en sjaldnar til lögreglu og um að gera að vera ekkert að hika við það.“

Lögreglan Friðrik Smári Björgvinsson yfirlögregluþjónn segir betra að tilkynna oftar en sjaldnar ef grunur leikur á einhverju misjöfnu.
Lögreglan flokkar tilkynningar í þrjá flokka eftir alvarleika málsins. Í fyrsta flokki eru tilkynningar þar sem meintur gerandi hafði boðið barninu far eða reynt að fá það með sér án þess að snerta það. Í þessum flokki lentu 112 tilkynningar eða 80 prósent allra málanna.

Í flokki tvö lentu tilkynningar þar sem barnið var snert, gripið í það, það elt eða fengið til að fylgja geranda án þess að reynt væri að brjóta á því kynferðislega, atvik þar sem fullorðinn var með kynferðislega tilburði eða orðalag við barn eða vísvitandi var reynt að villa um fyrir því til dæmis með því að segja að mamma þess hefði slasað sig og barnið ætti að koma með til að hitta hana á spítalanum. Alls voru þetta 25 tilkynningar eða 17,6 prósent málanna.

Í þriðja flokknum lentu svo þau þrjú mál sem áður var minnst á, þar sem börn voru tekin, farið með þau burtu og brotið á þeim á einhvern hátt kynferðislega eða 2,1 prósent mála.

Í flestum málum er talað um að gerandi sé á bíl, en lýsingar eru oft af skornum skammti bæði á ökutækjum og gerendum og því reynist oft erfitt að greina mynstur í tilkynningum sem benda á ákveðinn aðila. Á hinn bóginn hafa komið nokkur mál þar sem lýsing á ökutækjum hefur orðið til þess að upplýsa mál.


Tengdar fréttir

„Hann reyndi að ræna syni mínum“

Þrátt fyrir að einhver hafi reynt að lokka son hans upp í bíl til sín með sælgæti, er hann ekki reiður gerandanum eða vill honum illt, heldur vill hann að gerandinn leiti sér hjálpar.

Reynt að lokka dreng upp í bíl

Nemandi í fyrsta bekk í Seljaskóla var stoppaður á leið sinni heim úr skólanum af manni í bíl sem bauð honum sælgæti.




Fleiri fréttir

Sjá meira


×