Auglýstu ekki eftir sveitarstjóra þrátt fyrir vilja íbúa

Nýkjörin sveitarstjórn Svalbarðsstrandarhrepps réð Eirík Hauk Hauksson sem sveitarstjóra á fundi sveitarstjórnar fyrir helgi.

Á fundinum var einnig á dagskrá áskorun frá 83 íbúum, nærri þriðjungi kosningabærra manna í sveitarfélaginu, þess efnis að auglýsa ætti stöðu sveitarstjóra og viðhafa opin og gegnsæ vinnubrögð. Sú áskorun kom í kjölfar sveitarstjórnarfundar þar sem ákveðið var að ganga til samninga við Eirík í stað þess að auglýsa stöðuna.

Nokkurrar óánægju gætir í bæjarfélaginu með þessa ráðningu meirihluta sveitarstjórnar. Til að mynda greiddu tveir sveitarstjórnarmenn atkvæði á móti því að Eiríkur yrði ráðinn sveitarstjóri.

Eiríkur vék af fundi undir liðnum ráðning sveitarstjóra þar sem ganga átti frá ráðningarsamningi við Eirík þrátt fyrir að lög um hæfi sveitarstjórnarmanna segi ekki til um að hann hefði þurft þess. Atkvæði féllu svo þannig að þrír samþykktu ráðningu Eiríks en tveir voru á móti.

Halldór Jóhannesson samþykkti tillöguna um að ráða Eirík Hauk sem sveitarstjóra. Halldór og Eiríkur eru bræðrasynir og hefur Halldór starfað náið með föður Eiríks í viðskiptum í fjölda ára í gegnum einkahlutafélagið Veigastaði ehf.

Nýkjörin sveitarstjórn hafnaði áskorun þriðjungs kosningabærra manna um að auglýsa stöðuna og reyna að fá hæfasta manninn í stöðuna. Sveitarstjórn hafnaði á þeim forsendum að hún hefði komið of seint og búið væri að ákveða að ganga til samninga við Eirík Hauk. 

„Það var búið að ákveða að ganga til viðræðna við mig áður en listinn barst,“ segir Eiríkur Haukur í samtali við Fréttablaðið. „Það getur vel verið að vilji sveitarstjórnarfulltrúa hefði verið annar ef listinn hefði borist fyrr, en það eru bara svo mörg ef í þessu að ekkert er hægt að fullyrða um slíkt.“ 

Eiríkur segir það alls ekki algilt að sveitarfélög auglýsi stöðu sveitarstjóra lausa. „Það er normið að auglýsa ekki stöður sveitarstjóra. Það er aðeins gert í undantekningartilvikum ef við skoðum landið í heild. Við sjáum það líka í sveitarfélögum í kringum okkur þar sem störf eru auglýst og yfir fjörutíu manns sækja um en enginn er ráðinn,“ segir Eiríkur Haukur.