Innlent

Gátum ekki lagt fyrir PISA próf í tölvum

Óli Kristján Ármannsson skrifar
Krakkar í PISA-prófinu. Ísland tók að þessu sinni bara þátt í PISA prófum þar sem ekki þurfti að nota tölvu við úrlausn verkefna. Fjárskortur hamlaði, segir verkefnisstjóri PISA 2012 prófanna á Íslandi.
Krakkar í PISA-prófinu. Ísland tók að þessu sinni bara þátt í PISA prófum þar sem ekki þurfti að nota tölvu við úrlausn verkefna. Fjárskortur hamlaði, segir verkefnisstjóri PISA 2012 prófanna á Íslandi. Fréttablaðið/HAG
Fimmtán ára unglingar í Asíulöndum standa sig langbest við að leysa þrautir að því er fram kemur í nýbirtri PISA könnun.

Efstu þrjú sætin skipa Síngapúr, Kórea og Japan. Næstu sæti fjögur sæti þar á eftir skipa svo ólík svæði Kína, en í áttunda, níunda og tíunda sæti eru svo Kanada, Ástralía og Finnland.

Ísland er hins vegar hvergi að finna í samanburðinum. „Ég held að þarna séu öll önnur lönd, en um var að ræða skylduþátt í verkefninu,“ segir Almar M. Halldórsson, verkefnisstjóri PISA könnunarinnar 2012 á Íslandi.

Almar M. Halldórsson
„En þetta var skyldupartur á tölvur og tölvufyrirlögnin kostaði aukalega, bæði í framkvæmd og að vera með, og við höfðum ekki fjármagn til að taka þátt,“ bætir hann við.

Ísland hafi því fengið undanþágu frá þeim þáttum PISA könnunarinnar sem í þessari umferð hafi krafist tölvukostar í fyrirlagningunni.

Almar segir að í PISA könnunum sé að jafnaði líka aukakönnun, sem að þessu sinni snúi að þrautalausn í hóp og Ísland sé með í þeirri könnun.

„Við erum að forprófa núna og svo verða aðalprófin lögð fyrir vorið 2015 og svo fáum við niðurstöðurnar og samanburð við önnur lönd í desember 2016.“

Áður en kemur að birtingu þrautalauna í hóp segir Almar að eftir eigi að birta könnun á lesskilningi á rafrænan texta. „Þá er textinn allur í svona heimasíðuformi og krakkarnir þurfa að leita meira að efni líkt og við gerum á netinu.“

Ísland segir hann hins vegar ekki heldur vera með í þessum hluta PISA prófanna af sömu ástæðu. „Þetta var náttúrlega lagt fyrir á tölvu líka.“

Þrautalausnir á borð við þær sem nú var verið að birta segir Almar hins vegar að hafi einnig verið lagðar fyrir árið 2003 og þá hafi Ísland tekið þátt. Ólíklegt sé að miklar breytingar hafi orðið á getu barnanna síðan þá og því megi skoða þær niðurstöður til samanburðar.

Ísland var í þeirri könnun með 505 stig að jafnaði. Sú niðurstaða í samanburði við könnunina 2012 hefði skilað landinu í 20 sæti, á milli Austurríkis og Noregs. 

Löndin í tíu efstu sætum könnunarinnar voru með frá 523 til 562 stiga.

Neðstu sætin, frá 41. til 44. sætis, skipa Svartfjallaland, Úrúgvæ, Búlgaría og Kólumbía, með 407 til 399 stig.




Fleiri fréttir

Sjá meira


×