Friðarsúlan tendruð á afmælisdegi Yoko Ono

Listakonan Yoko Ono á afmæli þann 18. febrúar og hefur Reykjavíkurborg ákveðið að heiðra hana með því að tendra Friðarsúluna á afmælisdag hennar.

Yoko Ono hefur um langt árabil nýtt listina til þess að vekja fólk til umhugsunar um frið, mannréttindi og náttúruvernd. 

Þegar hún kaus að staðsetja Friðarsúluna í Viðey vakti hún heimsathygli á Reykjavík og Íslandi sem friðelskandi þjóð. Tendrun súlunnar í október ár hvert nýtur mikilla vinsælda bæði meðal Íslendinga og erlendra ferðamanna sem margir hverjir koma um langan veg til þess að vera viðstaddir viðburðinn.

Í fyrra var slegið met í fjölda þátttakenda þegar 1800 manns sigldu yfir Sundið í boði Yoko Ono en þessi viðburður mun að öllum líkindum stækka ár frá ári. Það er því vel við hæfi að tendra ljósið í Viðey á afmælisdag listakonunnar um leið og Reykjavíkurborg óskar henni til hamingju með daginn.

Friðarsúlan verður tendruð kl. 18:00 þriðjudaginn 18. febrúar og logar til 10:00 miðvikudaginn 19. febrúar.

Boðið verður upp á Friðarsúluferð kl. 20:00. Siglt verður frá gömlu höfninni í miðbæ Reykjavíkur.

Ljós Friðarsúlunnar sést vel af Höfuðborgarsvæðinu. Hana má einnig sjá í beinni útsendingu.