Segir auglýsingabann á áfengi órökrétt

Þrátt fyrir að Félag atvinnurekenda fagni viðleitni flutningsmanna áfengisfrumvarpsins svokallaða um að auka frelsi í viðskiptum með áfengi, gerir félagið engu að síður athugasemdir við ýmislegt í frumvarpinu.

„Með þessu frumvarpi þá er bara verið að auka frjálsræði á mjög afmörkuðu sviði, það er að færa smásölu á áfengi út í aðrar verslanir en þessar ríkisreknu. Það er svo margt annað skilið eftir,“ sagði Ólafur Stephensen, framkvæmdastjóri Félags atvinnurekenda í Reykjavík síðdegis. Tiltók hann sérstaklega það bann sem liggur við því að auglýsa áfengi.

Ólafur sagði bannið holótt, órökrétt og að sumu leyti gagnslaust þar sem áfengi sé auglýst á erlendum sjónvarpsrásum, netmiðlum og tímaritum. Innlendum framleiðendum sé hins vegar bannað að auglýsa sína vöru.

„Þetta er lykilatriði sem þarf að breytast. Ef menn hafa áhyggjur af því að þetta sé of stór biti að kyngja fyrir Alþingi að auka frjálsræði á þessu sviði líka þá hefði maður sagt að það ætti byrja á auglýsingabanninu. Annars er búið að skekkja þessa samkeppni og markaðsumhverfi svo mikið. Ég veit ekki um neitt land sem leyfir sölu áfengis í matvöruverslunum en bannar auglýsingar,“ sagði Ólafur.

Hlusta má á viðtalið við Ólaf í heild sinni í hér að ofan en einnig má nálgast ítarlega umsögn Félags atvinnurekenda um frumvarpið hér.