Á staðnum þegar stóru tíðindin gerast

„Fréttastofa Stöðvar 2 hefur verið á staðnum í hartnær þrjátíu ár í opinni dagskrá fyrir fólkið í landinu. Okkur langaði aðeins að rifja upp þessu stóru móment úr sögu þjóðarinnar frá þeim tíma og minna fólk á hversu öflug fréttastofa við erum,“ segir Breki Logason, fréttastjóri Stöðvar 2.

Fréttastofan frumsýnir í dag nýja og skemmtilega auglýsingu þar sem ljósi er varpað á ýmsa af þeim atburðum sem hafa á daga þjóðarinnar drifið síðustu áratugi. Á skömmum tíma má sjá fjölmörg eftirminnileg atvik.

„Við fórum í gegnum efnið okkar en það var Kristján Már Unnarsson, sem hefur verið hérna lengur en elstu menn muna, sem hafði veg og vanda af þeirri vinnu.

Þarna má sjá fyrstu beinu útsendinguna frá eldgosi á Íslandi, í lit, þegar Kristján færði okkur stemmninguna beint heim í stofu. Þarna eru líka ríkisstjórnarslit í beinni á Stöð 2, búsáhaldarbyltingin, sigrar og ósigrar.

Það er svolítið það sem við stöndum fyrir. Við erum á staðnum þegar stóru tíðindin gerast.“

Breki segir hópinn sem vinnur á fréttastofunni gríðarlega öflugan en að það hafi líka magnaðir karakterar unnið þar í gegnum tíðina. 

„Við erum svakalega stolt yfir því að vinna á fréttastofu sem hefur svona flotta og mikla sögu. Fólk hefur keyrt þetta áfram af mikilli ástríðu fyrir því að segja fréttir. 

Framundan hjá okkur eru síðan bjartir tímar. Við endurskoðum okkur stöðugt og viljum gera hlutina vel. Reynum að veita ráðamönnum þjóðarinnar aðhald og upplýsa í bland við létt og skemmtilegt efni. Við hlökkum til að vera áfram samferða fólkinu í landinu og segja því fréttir, þess vegna erum við til.“