Mexíkó skoraði þrjú á tíu mínútum og sendi Íslandsbanana heim

Mexíkó vann 3-1 sigur á Króatíu í lokaumferð A-riðils heimsmeistarakeppninnar í fótbolta í kvöld og tryggði sér um leið annað sætið í riðlinum.

Leikurinn var hreinn úrslitaleikur um annað sætið og þurftu Króatar sigur en Mexíkó dugði jafntefli til að komast áfram.

Markalaust var í fyrri hálfleik en fyrirliðinn Rafael Márquez skallaði knöttinn í netið eftir hornspyrnu fyrir Mexíkó á 72. mínútu og kom sínum mönnum yfir. Stipe Pletikosa hefði átt að gera betur í marki Króatíu.

Króatar þurftu þá að bæta í sóknina sem opnaði fleiri mögulega fyrir Mexíkó í þeirra sóknarleik. Ein skyndisókn þeirra varð að marki þegar AndrésGuardado skoraði með góðu skoti eftir fyrirgjöf OribePeralta á 75. mínútu, 2-0.

Ante Rebic komst einn í gegnum vörn Mexíkó skömmu síðar fyrir Króatíu og setti boltann framhjá GuillermoOchoa en bjargað var á línu. Mexíkóar staðráðnir í að halda hreinu í riðlakeppninni.

Mexíkóar voru ekki hættir en á 82. mínútu skoraði JavierHernández, leikmaður Manchester United, fyrsta landsliðsmark sitt í síðustu tíu leikjum eftir sendingu frá fyrirliðanum Marquéz.

Ivan Perisic minnkaði muninn fyrir Króatíu, 3-1, en þar við sat og Íslandsbanarnir eru á leið heim.

Frábær sigur hjá Mexíkó sem er komið upp úr riðli sjötta heimsmeistaramótið í röð. Það mætir Hollandi í 16 liða úrslitum í Fortaleza þann 29. júní.