Pirlo gæti leikið sinn síðasta landsleik á morgun

Andrea Pirlo, miðjumaður ítalska landsliðsins í knattspyrnu, gæti leikið sinn síðasta landsleik á morgun þegar liðið mætir Úrúgvæ í úrslitaleik í D-riðli á HM í Brasilíu.

Pirlo sagði fyrir HM að leikirnir í Brasilíu yrðu hans síðustu með landsliðinu og ef Ítalir ná ekki að minnsta kosti jafntefli gegn Úrúgvæ eru þeir úr leik.

Hann segist þó ekki vera að hugsa um þetta núna heldur að tryggja sínum mönnum áfram í 16 liða úrslitin. „Ég er ekki einu sinni byrjaður um að hugsa um framtíðina,“ segir Pirlo í viðtali við vef FIFA.

„Allir leikirnir á HM eru mikilvægir en þessi er eins og undanúrslitaleikur eða bara úrslitaleikur. Við erum ekkert stersssaðir samt því þetta er bara eins og hver annar leikur á endanum. Það yrðu auðvitað rosaleg vonbrigði að komast ekki áfram en við höfum þau gæði sem þarf til,“ segir Andrea Pirlo.