Hodgson ætlar ekki að hætta

Roy Hodgson hefur engan hug á að segja starfi sínu lausu þó svo að Englendingar sitji eftir í riðlakeppni HM í Brasilíu.

Englendingar töpuðu fyrir Úrúgvæ, 2-1, og eru stigalausir eftir fyrstu tvo leikina í D-riðli. Margt þarf að ganga upp til að sigur gegn Kosta Ríku á föstudag dugi til að koma liðinu áfram í 16-liða úrslitin.

„Ég hef það ekki í hyggju að hætta,“ sagði hinn 66 ára gamli Hodgson eftir leikinn í gær.

„Ége er mjög ánægður með hvernig leikmenn hafa brugðist við minni vinnu með landsliðinu. Úrslitin eru mér auðvitað mikil vonbrigði en ég finn ekki fyrir þörf að hætta.“

„Hins vegar gæti enska knattspyrnusambandinu fundist að ég sé ekki rétti maðurinn fyrir starfið. Það yrði þeirra ákvörðun, ekki mín.“

Steven Gerrard, landsliðsfyrirliði, hrósaði Hodgson mjög. „Hans upplegg fyrir leikinn var gott en við náðume kki að fylgja því eftir. Við verðum að taka ábyrgð á því. Roy er frábær þjálfari.“