Suarez afgreiddi England

Englendingar eru komnir með annan fótinn upp í flugvél á leið heim eftir að hafa tapað, 2-1, fyrir Úrúgvæ á HM í kvöld. Luis Suarez skoraði bæði mörk Úrúgvæja og Wayne Rooney náði loksins að skora á HM.

Leikurinn fór nokkuð líflega af stað en það var bið eftir marki.

Markið kom aftur á móti sex mínútum fyrir leikhlé. Þá skallaði Luis Suarez boltann laglega í netið eftir frábæra sendingu frá Cavani.

Draumamark og eðlilega fagnaði Suarez markinu eins og óður maður.

Englendingar byrjuðu síðari hálfleikinn mjög illa en eftir því sem fór að líða á hálfleikinn tóku þeir völdin. Pressan þyngdist með hverri mínútunni og korteri fyrir leik var komið að sögulegri stund.

Wayne Rooney skoraði þá sitt fyrsta mark á HM en það tók 765 mínútur og 28 skot að komast á blað. Hann fékk þá sendingu inn í teiginn frá Glen Johnson sem hann mokaði yfir línuna.

Það var verst fyrir Englendinga að Suarez var ekki hættur. Hann komst í gegn sex mínútum fyrir leikslok og kom Úrúgvæ yfir með stórkostlegri afgreiðslu. Svo ánægður var hann með markið að hann grét næstum er hann fagnaði því.

Þó svo England hafi tapað á liðið enn möguleika á því að fara áfram. Fyrst þarf liðið að treysta á sigur Ítala gegn Kosta Ríka á morgun. Svo þarf England að vinna Kosta Ríka næst og treysta aftur á Ítalíu gegn Úrúgvæ.