Hodgson: Er gríðarlega vonsvikinn

Roy Hodgson, landsliðsþjálfari Englands, var að vonum svekktur eftir tapið gegn Úrúgvæ í kvöld.

"Við stóðum okkur vel að komast aftur inn í leikinn og hefðum þes vegna getað unnið hann líka miðað við yfirburðina sem við höfðum," sagði Hodgson.

"Ég er gríðarlega vonsvikinn. Við mættum til leiks með miklar væntingar og náðum ekki að gera það sem við ætluðum okkur. Það er sorglegt.

"Það var enginn að svíkja liðið né þjóðina í þessum leik. Við fengum á okkur tvö mörk úr nánast einu færunum sem þeir fengu. Við stýrðum ferðinni en náðum ekki að skora meira.

"Úrugvæ er með sterkt varnarlið og gerði okkur erfitt fyrir. Suarez skoraði tvö frábær mörk og var lítið við þeim að gera."