Vissi ekki að Villa væri að hætta

Vicente Del Bosque, þjálfari spænska landsliðsins, viðurkenndi eftir leik að hann hefði ekki haft hugmynd um að David Villa væri að leika sinn síðasta leik með spænska landsliðinu í gær.

Del Bosque sagði eftir sigurleik Spánverja á Áströlum að hann hefði ákveðið að setja Villa inná til að skerpa á sóknarleiknum. Villa skoraði glæsilegt mark og kemur til með að eiga markametið hjá Spánverjum í einhvern tíma.  

Villa skoraði 59 mörk í 97 leikjum fyrir Spánverja en næstur honum kemur Real goðsögnin, Raul Gonzalez sem skoraði 44 mörk í 102 leikjum. Fernando Torres er í þriðja sæti yfir markahæstu menn Spánverja með 38 mörk í 110 leikjum.

Villa varð tvisvar Evrópumeistari og einu sinni heimsmeistari með Spánverjum.

Villa er búinn að gera sex mánaða samning við New York City í MLS-deildinni.  Bandaríska liðið lánaði hann til Melbourne City þar sem hann spilar hann 10 leiki áður en hann snýr aftur til New York.