Máluðu nagla að næturlagi

Jóhannes Valgeir Reynisson, betur þekktur sem Blái Naglinn, tók upp pensilinn að næturlagi í vikunni. Á augabragði málaði hann ásamt vöskum mönnum tólf stóra bláa nagla við hin fjölförnu gatnamót Miklubrautar og Kringlumýrarbrautar.

Ástæðan er til að vekja athygli á herferð til styrktar rannsóknum á ristilkrabbameini á Landspítalanum.

„Við ætlum að gefa öllum sem verða fimmtugir árið 2015, 2016 og 2017 skimunarpróf,“ segir Jóhannes Valgeir. Hann er búinn að reikna að gefa þurfi 4388 próf í afmælisgjöf árin þrjú. Jóhannes Valgeir segir mikilvægt að auka vitund um ristilkrabbamein enda deyi 52 einstaklingar á ári á Íslandi af þeim völdum. Það svarar til eins Íslendings á viku. Með skimunarprófi er hægt að lækka dánartíðnina um 25%, og með ristilspeglun er hægt að lækka tíðnina um 80%.

„Búið er að lækka dánartíðnina í tilfelli brjóstakrabbameins um 25-30%,“ segir Jóhannes Valgeir. Með ristilspeglun megi lækka dánartíðni í tilfelli ristilkrabbameins um allt að 80% að sögn Jóhannesar.

Áður hefur Vísir fjallað um uppboð á treyju brasilísku knattspyrnugoðsagnarinnar Pele til styrktar málstaðnum. Þá er framundan ráðstefna á Grand Hótel þann 20. september þar sem fjallað verður um ristilkrabbamein út frá öllum hliðum.