Ástandið viðkvæmt þó rólegt sé á vígstöðum

Fremur rólegt á vígstöðvunum við borgina Mariupol í Úkraínu eftir að vopnahlé komst á á svæðinu milli Úkraínumannna og Rússa en ástandið er þó afar viðkvæmt. Aðskilnaðarsinnar segja að vopnahléið þýði ekki að þeir muni slaka á kröfum sínum og stjórnvöld í Rússlandi segjast munu bregðast við með afgerandi hætti verði frekari viðskiptaþvinganir Evrópusambandsríkja samþykktar.

Íbúar borgarinnar Mariupol fengu hvíld frá átökum undanfarinna daga og vikna í dag og reyndu margir að fást við hversdagslega hluti að því tilefni.

„Eftir að vopnahléi var lýst yfir varð ástandið á hryðjuverkasvæðinu almennt rólegra. En samt var tilkynnt um nokkrar ögranir hryðjuverkamanna í gærkvöldi og nótt. Á síðasta sólarhring vörpuðu uppreisnarmenn sprengjum á stöðvar sveita sem vinna gegn hryðjuverkum 28 sinnum, þar af tíu sinnum eftir að vopnahléi var lýst yfir,“ sagði Andriy Lysenko, talsmaður öryggis- og varnarmálaráðuneytis Rússlands.

En þrátt fyrir að vopnahléið hafi verið samþykkt í gær ákvað Evrópusambandið að herða refsiaðgerðir sínar gegn Rússum. Ferðafrelsi valdamanna verður takmarkað enn frekar og eignir þeirra frystar. Aðgengi Rússa að olíumörkuðum verður skert sem og að vopnaframleiðendum. Aðgerðirnar eiga að taka gildi á mánudaginn nema Rússar samþykki að draga herlið sitt tilbaka frá austurhluta Úkraínu.

Ekki ríkir mikil bjartsýni á að Rússar verði við þessum kröfum og segir utanríkisráðherra Rússlands að þarlend stjórnvöld muni bregðast við með afgerandi hætti verði frekari viðskiptaþvinganir Evrópusambandsins samþykktar. Þá eru uppi efasemdir um að aðskilnaðarsinnar í Úkraínu komi til með standa við sinn hluta samningsins um vopnahléið eftir að sjálfskipaður forsætisráðherra Luhansk sagði að áfram yrði barist fyrir aðskilnaði frá Úkraínu.