Óttast fjöldauppsagnir hjá Landbúnaðarháskóla Íslands

Prófessor við Landbúnaðarháskóla Íslands óttast að fjölda starfsmanna skólans verði sagt upp störfum nú þegar hætt hefur verið við sameiningu skólans við Háskóla Íslands.  Menntamálaráðherra vill sjá sameiningu skólanna.

Allt stefndi í að Landbúnaðarháskóli Íslands og Háskóli Íslands myndu sameinast og var talað um að það gæti gerst um næstu áramót. Nú hefur verið hætt við sameininguna vegna andstöðu einhverra sveitarstjórnarmanna í Borgarbyggð, Bændasamtakanna og einstaka þingmanna kjördæmisins.

Ólafur Arnalds, prófessor við Landbúnaðarháskólann skrifaði harðorða grein í Fréttablaðið í gær þar sem hann lýsti óánægju sinni með þá ákvörðun að hætta við sameiningu skólanna.

„Nú er sem sagt hætt við og um leið er skólinn fjárvana og virðist ekki eiga að gera neitt í því. Þá er bara komin upp sú staða að það verður trúlega sagt upp fjölda manns og dregin saman seglin í skólanum og í raun og veru stefnir í að það munu fjara undan starfseminni. Ég er ekki mjög sáttur við þá stöðu, alls ekki,“ segir Ólafur.

En af hverju að sameina þessa tvo háskóla ?

„Rökin eru fyrst og fremst bara fagleg, það er augljós gríðarleg samlegðaráhrif, sem geta falist í þessari sameiningu og þau nýtast bæði nemendum og í kennslunni og til þess að styrkja og renna styrkari stoðum undir rannsóknarstarfsemina þannig að við fáum mun öflugri starfsemi á þessum sviðum, sem  skólinn stendur fyrir með því að sameina,“ bætir Ólafur við.

Illugi Gunnarsson, menntamálaráðherra var eindregin þeirra skoðunar í vor þegar fréttamaður tók viðtal við hann um sameiningu skólanna að þeir ættu að renna undir sömu sæng.

„Ég er mjög þeirrar skoðunar að það sé skynsamlegt fyrir landbúnaðinn, fyrir landbúnaðarrannsóknir og kennslu í landbúnaðarvísindum að sameina Háskóla Íslands og Landbúnaðarháskólann. Nýta þar með þann kraft og afl, sem er í háskólanum til þess að efla landbúnaðinn á Íslandi. Ég held að það séu stórkostleg sóknarfæri fyrir okkur á þessu sviði og ég auðvitað vonast til þess að það verði hægt að ná því fram“, segir Illugi.