Campbell: Ég fer aftur til Arsenal

Framherjinn Joel Campbell mun snúa aftur til Arsenal eftir HM í Brasilíu. Hann staðfesti þetta í samtölum við blaðamenn eftir sigur Kosta Ríka á Úrúgvæ í gær.

"Að sjálfsögðu sný ég aftur, því ég er með samning við Arsenal. En það mikilvægasta þessa stundina er Kosta Ríka og HM," sagði Campbell en hann átti frábæran leik gegn Úrúgvæ og skoraði jöfnunarmark sinna manna.

"Þetta var frábær dagur fyrir mig, en það hefði ekki skipt neinu ef ekki hefði verið fyrir framlag samherja minna.

"Allir gerðu það sem þeir áttu að gera. Ég gerði mitt besta til að skora mörk og félagarnir hjálpuðu mér."

Campbell, sem er 21 árs, var keyptur til Arsenal sumarið 2011, en hann hefur verið á láni hjá Lorient, Real Betis og Olympiacos á síðustu árum.