Þrjár milljónir á dag

„Við munum lenda í því að einhver kemur inn á bráðadeild Landspítalans vegna gruns um að viðkomandi sé smitaður af ebólu.

Við leggjum mikla áherslu á að vera viðbúin þegar það gerist,“ segir Ólafur Baldursson, framkvæmdastjóri lækninga á Landspítalanum.

Ólafur segir að sjúkrahúsið sé ekki að öllu leyti tilbúið til að taka á móti sjúklingi sem væri með grun um ebólusmit, hins vegar yrði sjúkrahúsið að taka á móti viðkomandi ef sú staða kæmi upp.

„Viðbragðsáætlun er til og við myndum gera okkar besta við slíkar aðstæður.“

Bráðalyflækningadeild í Fossvogi myndi taka á móti þeim sem kæmu vegna gruns um ebólusmit og þar hefur verið unnið að breytingum á húsnæði svo það henti verkefninu. Ekki er til fullkomin einangrunaraðstaða hér á landi sambærileg við það sem nágrannalöndin hafa yfir að ráða en það er verið að gera úrbætur. Vatns- og örveruheldur hlífðarbúnaður er til staðar og veiruheldar grímur eru til.

Sigríður Gunnarsdóttir, framkvæmdastjóri hjúkrunar segir að í júlí hafi sjúkrahúsið farið að búa sig undir að taka á móti einstaklingum sem kæmu vegna gruns um ebólusmit.

„Það er verið að setja saman teymi sem verður skipað 25 til 30 hjúkrunarfræðingum og læknum. Hlutverk hópsins verður að sinna þeim sem annaðhvort koma inn vegna gruns um smit eða veikjast hér á landi af ebólu. Það á eftir að þjálfa hópinn, en þjálfunarprógramm er tilbúið.

Stjórnvöld hafa komið að þessu máli með okkur undanfarna daga hvað mögulegan kostnað varðar,“ segir Sigríður og bætir við að þjálfun hópsins muni ekki bara nýtast vegna ebóluverkefnisins heldur verði hægt að kalla hópinn saman, komi upp aðrar farsóttir í framtíðinni.

Eins og komið hefur fram ítrekað í fréttum glímir Landspítalinn við peningaleysi og húsakost sem hentar ekki nútíma háskólasjúkrahúsi. Allur óvæntur kostnaður kemur því illa við sjúkrahúsið. Ólafur segir að nú þegar hafi ebólan kostað sjúkrahúsið að lágmarki 10 milljónir króna. Þær felist í breytingum á húsnæði og launakostnaði þeirra sem eru að búa sig undir að taka á móti smituðum. „Við höfum gert ákveðnar áætlanir vegna ebólunnar og höfum vilyrði fyrir fjármagni í verkefnið,“ segir hann.

Sigríður segir að margt starfsfólk þurfi í kringum þá sem kæmu inn á sjúkrahúsið og væru með hugsanlegt ebólusmit.

„Hér sinnum við þjónustu allan sólarhringinn. Við þurfum að lágmarki þrjá hjúkrunarfræðinga á hverja átta tíma vakt, og tvo lækna. Það eru því 11 sem þyrftu að sinna viðkomandi hvern sólarhring sem það tæki að skera úr um það hvort viðkomandi væri með ebólu eða einhvern annan sjúkdóm.“ Hún segir að kostnaðurinn yrði að lágmarki þrjár milljónir króna á sólarhring. Ef sinna þyrfti sjúklingi með staðfest smit hleypur kostnaður hinsvegar á tugum milljóna.

„Sjúkrahúsið stendur höllum fæti. Þegar við fáum flókið og erfitt verkefni eins og ebólu þá er það þrautin þyngri fyrir sjúkrahúsið. Samt bregðumst við við og leggjum allt í að tryggja öryggi allra, bæði starfsfólksins og hugsanlegra sjúklinga,“ segir Ólafur.