Ekki dæmigerð fyrir HIV jákvæða

Sigrún Grendal Magnúsdóttir er fjölskyldukona og amma, starfar sem talmeinafræðingur og afródanskennari en greindist HIV jákvæð fyrir tveimur og hálfu ári, þá 59 ára. Hún segir enga ástæðu til þess að leyna því og vekur athygli á að alls konar fólk geti smitast.

Líf þeirra sem hafa greinst HIV jákvæðir hefur tekið byltingarkenndum framförum. Alþjóða alnæmisdagurinn er í dag.

Alvarlegur sjúkdómur en samt ekki sjokk

Um viðbrögð Sigrúnar þegar henni var sagt að hún væri með HIV veiruna sagði hún að upplýsingarnar hefur skipt öllu máli. „Ég gerði mér strax grein fyrir því að hugmyndir mínar um HIV væru gamlar svo ég ákvað að ég ætlaði að fræðast svoldið meira áður en ég færi að setja einhver viðbrögð í gang gagnvart sjálfri mér og öðrum,“ sagði Sigrún við Stöð 2 í kvöld.

„En svo eftir fyrsta viðtal hjá lækni og eftr nánari lýsingu þá fékk ég ekkert sjokk eða neitt þannig. Þetta var alvarlegur sjúkdómur en ég sá að það var alveg hægt að ráða við hann. Einu ári síðar var veiran nánast ómælanleg og ég er ekki smitandi,“ sagði hún. Sigrún segist einungis þurfa að taka eina töflu á dag samviskusamlega, fara vel með sig og því hraust og eðlileg.

Smitaðist líklega á ferðalögum í Afríku

Í dag tekur fólk með HIV væga lyfjaskammta, oftast einungis eina töflu daglega til æviloka en áður þjáðist fólk mikið og þoldi illa stóra skammta vegna aukaverkana.

„Þetta er í raun eins og svart og hvítt,“ segir Sigrún um muninn á því að bera veiruna í dag og áður. „Þannig að ég, gamla konan er dæmi um svona nútímann, það má eiginlega segja það,“ segir hún hlæjandi.

Ekki rétta ímyndin 

„Fólki bregður eðlilega þegar ég segi að ég er HIV jákvæð og spyr mjög opinskátt sem mér finnst í raun og veru mjög dásamlegt, segir Sigrún sem veit ekki hvenær hún smitaðist en rekur það til frumstæðrar læknisþjónustu sem hún þáði á tíðum ferðum sínum til Gíneu í Afríku.

„Það var margt sem var farið að hrjá mig, margt smátt en hafði alltaf verið mjög heilsuhraust og orkumikil. Heimilislæknirinn var mjög duglegur að senda mig í alls konar prufur en datt seint í hug HIV því ég held að ég sé kannski ekki ímynd HIV jákvæðra manneskju, eins fólk hefur, bæði ég og aðrir,“ segir hún.

Flestir smitast við kynmök eða með óhreinum sprautunálum hjá fíkniefnaneytendum.

Vísindin framar félagslegri þróun

„Ég vildi að það værir raunin", sagði Einar Þór Jónsson, framkvæmdastjóri HIV-Íslands samtakanna í viðtali á Stöð 2 í kvöld, aðspurður um hvort að viðhorf til smitaðra væru samtaka framfara í vísindum vegna HIV. Rætt var við Einar í húsakynnum samtakanna við Hverfisgötu þegar haldið var upp á daginn þar.

Frá 1983 hafa hér á landi 322 einstaklingar greinst, 67 þeirra veikst af alnæmi og 39 látist. Mikil bylting varð árið 1996 þegar ný lyf komu á markaðinn sem halda veirunni niðri og draga verulega úr líkum á smiti eða útiloka það jafnvel alveg. Ellefu greindust HIV jákvæðir í ár.

AIDS faraldurinn er þó enn mikill í þróunarlöndunum og stórum borgum heimsins. Yfir 80 prósent af nýsmituðum í heiminum eru í aðeins þrjátíu löndum.