Ágætis veður í kortunum

Áfram er spáð góðu veðri á landinu í dag með hæglætis vindi og hita upp á sex- til tólf stig.

Hlýjast verður um vestanvert landið, en undir kvöld er búist við rigningu á sunnan- og austanverðu landinu. Þrátt fyrir hlýindin að undanförnu telur Veðurstofan enn nokkra snjóflóðahættu á norðanverðum Vestfjörðum, utanverðum Tröllaskaga og á Austfjörðum.

Enn er víða mikill snjór í fjöllum og þar sem víða ringdi ofan í hann um helgina, þyngist snjóþekjan, sem getur valdið snjóflóðum. Ekki hafa þó borist fregnir af slíku í gærkvöldi eða í nótt.