HM í hættu hjá Radamel Falcao

Kólumbíski landsliðsframherjinn Radamel Falcao meiddist í gær á hné í bikarsigri Mónakó á neðri deildarliðinu Monts d'Or Azergues. Það er ekki ljóst hversu alvarleg meiðslin eru en HM í Brasilíu gæti verið í hættu hjá þessum frábæra leikmanni.

Radamel Falcao skoraði mark á 29. mínútu en var borinn af velli rétt fyrir hálfleik eftir harða tæklingu varnarmannsins Soner Ertek.

„Leikmaðurinn fékk högg á vinstra hnéð. Við verðum að bíða eftir niðurstöðum frekari rannsókna og læknisskoðunar til að vita meira um meiðslin," segir í fréttatilkynningu frá Mónakó.

Claudio Ranieri, þjálfari Mónakó var að sjálfsögðu ósáttur með að missa aðalstjörnu sína.

„Þegar þú mætir neðri deildarliði þá er vitað að mótherjinn mun spila af mikill hörku. Það er eðlilegt og það sem ég segi mínum leikmönnum fyrir leikinn. Ef meiðsli Falcao eru alvarleg þá er það dómaranum að kenna. Það vilja allir spila eins og í ensku deildinni og láta leikinn fljóta. Það er ekki mögulegt hér og dómararnir verða að taka á svona grófum leik," sagði Claudio Ranieri.

Radamel Falcao hefur skorað 9 mörk í 17 leikjum með Mónakó en franska félagið borgaði Atletico Madrid 50 milljónir punda í sumar.

Kólumbía er í riðli með Grikklandi, Fílabeinsströndinni og Japan á HM í Brasilíu en Radamel Falcao skoraði níu mörk í undankeppninni þar sem kólumbíska landsliðið endaði í 2. sæti í Suður-Ameríkuriðlinum.