Kjaraviðræðurnar strand í bili

Kjaradeilu flugumsjónarmanna við Icelandair hefur verið vísað til ríkissáttasemjara. Samningar þeirra urðu lausir 1. febrúar.

„Það er allt strand eins og er,“ sagði Karl Friðriksson, formaður Félags flugumsjónarmanna, í samtali við Fréttablaðið. „Við erum að gera kröfur um bætt starfskjör og hækkun launaflokka.“ Hann segir flugumsjónarmenn vilja um tveggja prósenta launahækkun á launatöflu. Karl segir að enn hafi ekki verið boðað til fundar hjá ríkissáttasemjara en gerir ráð fyrir að það verði gert fljótlega. Ríkissáttasemjari er í sumarfríi eins og er þannig að líklegt er að það verði ekki fyrr en í ágúst.

„Það verður að skoðast í samhengi við fyrstu fundi,“ segir Karl spurður hvort stéttin hyggist fara í hart.

Flugumsjónarmenn undirbúa flug frá landinu, gera flugáætlanir og safna saman veðurupplýsingum og koma þeim til flugmanna.

Guðjón Arngrímsson er vongóður um að samningar náist án mikilla truflana á samgöngum.

„Þeim verður boðið það sama og aðrir hafa verið að semja um,“ sagði hann í samtali við Fréttablaðið.