Hefur áhyggjur af stöðu framhaldsskólakennara

Sigmundur Davíð Gunnlaugsson forsætisráðherra telur að gera eigi samning við framhaldsskólakennara til lengri tíma.

Ráðherrann sagðist í viðtali í Bítinu í morgun hafa talsverðar áhyggjur af stöðu mála hjá kennurum. Atkvæðagreiðslu þeirra um verkfall lýkur á morgun.

„Ég vonast til þess að menn leysi þetta eins og aðra kjarasamninga með því að gera samninga til lengri tíma núna,“ sagði Sigmundur Davíð. Lengri samningar bæti kaupmátt jafnt og þétt.

„Ef að menn ná saman um slíkt er ríkisstjórnin að sjálfsögðu tilbúin að leggja sín lóð á vogarskálina til að tryggja þann stöðugleika sem er forsendan.“

Sigmundur segir allar forsendur til að gera langtímasamning sem muni fela í sér aukinn kaupmátt til næstu ára.