Aron: Ísland mun komast á HM

Aron Jóhannsson segir að hann ætli að gera allt sem hann geti til að vinna sér sæti í leikmannahópi Bandaríkjanna fyrir HM í Brasilíu.

Aron, sem er uppalinn hér á landi en fæddur í Bandaríkjunum, valdi á sínum tíma að gefa fremur kost á sér í bandaríska landsliðið en það íslenska.

Bandaríkin keppir á HM í Brasilíu í sumar en Aron hefur verið fastamaður í hópi Jürgen Klinsmann landsliðsþjálfara síðan hann varð gjaldgengur í liðið.

„Ég reyni að einbeita mér að því að æfa vel á hverjum degi og standa mig vel með AZ,“ sagði Aron í samtali við vefmiðilinn Goal.com.

„Það væri mikill heiður fyrir mig að komast með liðinu til Brasilíu og ótrúlegt að fá að spila á stærsta sviði knattspyrnunnar.“

„Ef allt fer að óskum gæti 2014 orðið mikilvægasta ár ferilsins míns. Það er draumur hvers knattspyrnumanns að spila á HM og sýna heiminum hversu góður maður er.“

Hann segist hafa fylgst vel með gengi Íslands í undankeppni HM en strákarnir töpuðu fyrir Króatíu í umspil um sæti í keppninni.

„Ég var að vona að Ísland myndi komast á HM en því miður tókst það ekki. Þeir eru að verða betri og betri. Þetta tekst fljótlega hjá þeim.“

Aron var valinn í íslenska landsliðið í október árið 2012 en hann gat ekki gefið kost á sér vegna nárameiðsla.

„Þetta hefði getað farið allt öðruvísi hefði ég spilað með Íslandi. En það gerðist ekki og nú spila ég með Bandaríkjunum. Það er ástæða fyrir öllu sem gerist.“