Gera ráð fyrir 8,8 milljarða afgangi 2015

Fyrsta fjárhagsáætlun nýs meirihluta Reykjavíkurborgar var lögð fram í borgarstjórn í dag. Um er að ræða frumvarp að fjárhagsáætlun Reykjavíkurborgar fyrir árið 2015 auk fimm ára áætlunar.

„Þetta er varfærin fjárhagsáætlun sem einkennist fyrst og fremst af ábyrgum rekstri og öðrum áherslum nýs meirihluta.  Reksturinn gengur í stuttu máli fínt en við þurfum að hafa aðeins fyrir þessu,“ segir Dagur B. Eggertsson borgarstjóri í tilkynninginu frá borginni.

„Fyrirtækin okkar eins og Orkuveitan eru enn að greiða niður miklar skuldir en á næstu fimm árum verða skuldir OR farnar niður um 80 milljarða.“

Óbreyttir skattar

Í frumvarpinu er skatthlutföll óbreytt en þó taka nokkrar gjaldskrár verðlags- eða kostnaðarhækkunum. Útsvar verður áfram 14,52 prósent, álagningarhlutföll fasteignaskatta og lóðarleigu verða einnig óbreytt bæði í 0,2 prósentum.

Þá er einnig lagt til að álagningarhlutfall fasteignaskatta af opinberu húsnæði verði óbreytt eða 1,32 prósent. Sömu sögu er að segja af álagningarhlutfalli fasteignaskatta af atvinnuhúsnæði. Það verði óbreytt í 1,32 prósetnum auk 25 prósenta álgs eða alls 1,65%.

Hins vegar munu gjaldskrár leikskóla lækka og teknir verða upp systkynaafslættir, þvert á skólastig.

Afgangur þessa árs meiri en spáð var

Rekstrarniðurstaða Reykjavíkurborgar á næsta ári er áætluð jákvæð um 8,8 milljarða. Þá segir í tilkynningunni að gert hafi verið ráð fyrir jákvæðri niðurstöðu um 8,1 milljarð á þessu ári. Samkvæmt útkomuspá ársins er þó gert ráð fyrir 14,4 milljarða afgangi.

Sú aukning er að mestu til komin vegna hækkandi álverðs, hækkandi gengis og minni verðbólgu en þjóðhagsspá gerði ráð fyrir í fyrra.

Í tilkynningunni segir að í fjárhagsáætluninni megi finna þær áherslur sem meirihlutinn kynnti í sumar. Eins og að gjöld á barnafjölskyldur lækka, frístundakortið hækkað, stofnað er nýtt stjórnkerfis- og lýðræðirsráð og áhersla lögð á velferðarmál, læsi og verk- og listgreinar í skólum. Auk uppbyggingar leigumarkaðar og annarra uppbyggingaráforma.

Kostnaður vegna kjarasamninga 5,3 milljarðar

Þá eru stærstu breytingarnar í rekstri borgarsjóðs á milli ára að kjarasamningar færðu starfsfólki borgarinnar allnokkrar kjarabætur. Í heildina er útlit fyrir að kostnaður vegna kjarasamninga sé um 5,3 milljarðar króna.

Til að mæta kækkandi launakostnaði er gerð aðhaldskrafa á öll fagsvið. Í tilkynningunni segir að framlög hafi þó verið aukin lítillega til velferðarmála. Þá einkum búsetuþjónustu við fatlað fólk, þjónustu við geðfatlaða og barnavernd.

Varðandi fjárfestingar verður lögð áhersla á verkefni sem auka lífsgæði í borginni, samkvæmt tilkynningunni.

Undirbúin verður viðbygging við Sundhöllina og Borgarbókasafnið, auk skóla-, sundlaugar og menningarmiðstöðvar í Úlfarsárdal. Hjólreiðaáætlun er myndarleg sem fyrr og áhersla er lögð á tímabært viðhald á skólahúsnæði víða um borgina.  Reykjavíkurborg mun fjárfesta fyrir um 9,2 milljarða króna 2015. Þar af vegna fasteigna og stofnbúnaðar 4,4 milljarðar, gatnaframkvæmda 2,9 milljarðar, endurbóta og meiriháttar viðhalds 1,1 milljarður og kaupa á lóðum og skipulagseignum 200 milljónir króna.

Frumvarpið má sjá hér á heimasíðu Reykjavíkur. Þá má sjá myndræna framsetningu hér.