Lampard ætlar að halda áfram með enska landsliðinu

Frank Lampard er ekki búinn að taka ákvörðun um hvort hann sé hættur að leika með landsliðinu eftir að Englendingar duttu úr keppni í gær. Lampard sem er 36 ára hefur leikið 106 leiki fyrir Englands hönd.

England olli miklum vonbrigðum á mótinu í Brasilíu og fer enska liðið heim með skottið á milli lappanna. Liðið nældi aðeins í eitt stig og þrátt fyrir að vera í erfiðum riðli var krafa um betri árangur að heiman. Lampard lék aðeins einn leik á mótinu gegn Kosta Ríka í gær og bar hann fyrirliðabandið í leiknum.

Lampard sem er á förum frá Chelsea vissi að þetta yrði sennilega síðasta Heimsmeistaramótið sem hann myndi leika í en ætlaði ekki að leggja landsliðsskónna á hilluna.

„Ég veit ekki hvert framhaldið er. Ég elska að spila fyrir enska landsliðið og að hitta ensku strákana fyrir leiki. Mér líður eins og ég eigi nóg eftir og hafi eitthvað fram að færa. Á meðan ég hef eitthvað fram að færa langar mig ekki að draga mig úr myndinni,“ sagði Lampard.