Bosnía gerði út um drauma Írans

Bosnía og Hersegóvína gerði út um drauma Írans í F-riðli heimsmeistarakeppninnar í fótbolta í dag með sigri í leik liðanna, 3-1.

Íran átti möguleika á að komast upp úr riðli en til þess þurfti það að vinna Bosníu og Nígería að tapa fyrir Argentínu á sama tíma. Argentína sá um sitt en tap í dag hjá Íran þýðir að Nígería fer áfram.

Edin Dzeko kom Bosníumönnum á bragðið á 23. mínútu, hans fyrsta mark í lokakeppni HM. Miralem Pjanic kom Bosníu svo í 2-0 á 59. mínútu áður en RezaGhoochannejhad minnkaði muninn þegar átta mínútur voru til leiksloka.

Íranir hlupu til baka með boltann í von um að þeir ættu inni kraftaverk en vonir þeirra dóu endanlega þegar Avdija Vrsajevic tryggði Bosníu 3-1 sigur með marki í næstu sókn.

Bosnía að vinna sinn fyrsta leik í lokakeppni HM en bæði lið úr leik og fara nú heim.