Heldur markaflóðið áfram í Salvador í dag?

Bosnía og Íran mætast í dag í lokaleik sínum í F-riðli á HM í Brasilíu og það er von á markaleik í beinni á Stöð 2 Sport 2 ef marka má fyrri leiki keppninnar á Arena Fonte Nova í Salvador.

Það hafa alls verið skoruð 17 mörk í þessum þremur leikjum á Arena Fonte Nova í Salvador á HM í Brasilíu til þessa sem gerir 5,7 mörk í leik.

Þar unnu Hollendingar 5-1 sigur á Spáni, Þjóðverjar unnu þar 4-0 sigur á Portúgal og loks unnu Frakkar 5-2 sigur á Sviss í síðasta leik. Allt voru þetta líka leikir á milli tveggja sterkra knattspyrnuþjóða frá Evrópu.

Nú verður fróðlegt að sjá hvort að boðið verði upp á fjórðu markaveisluna í röð á Arena Fonte Nova í Salvador en Íranar verða að vinna leikinn til þess að eiga möguleika á því að komast í sextán liða úrslitin.

Bosníumenn röðuðu inn mörkum í undankeppninni en þeir eiga ekki lengur möguleika á því að komast áfram eftir tapleiki á móti Argentínu og Nígeríu.m

Leikur Bosnía og Íran hefst klukkan 16.00 og er í beinni á Stöð 2 Sport 2.