Villas-Boas fær Garay til Pétursborgar

Argentínski miðvörðurinn EzequielGaray er genginn í raðir rússneska úrvalsdeildarliðsins Zenit frá Pétursborg en hann hefur leikið með Benfica undanfarin þrjú ár.

Garay hefur lengi verið orðaður við Manchester United og ekki hafa þær sögusagnir minnkað í ljósi brotthvarfs Nemanja Vidic og Rio Ferdinands eftir að síðustu leiktíð lauk.

André Villas-Boas, fyrrverandi stjóri Chelsea og Tottenham, er þjálfari Zenit en hann þekkir vel til Garays eftir að hafa þjálfað Porto og mætt Argentínumanninum nokkrum sinnum.

Kaupverðið er talið vera um 15 milljónir evra en Benfica fær aðeins sex milljónir í sinn hlut því það á ekki nema 40 prósent í leikmanninum. Real Madrid á 50 prósent og þriðji aðili 10 prósent.

Garay er þessa dagana staddur með argentínska landsliðinu á HM í Brasilíu. Argentína vann Nígeríu, 3-2, fyrr í dag og tryggði sér efsta sætið í F-riðli. Það mætir annaðhvort Ekvador eða Sviss í 16 liða úrslitum.