Mertesacker í 100 leikja klúbbinn

Per Mertesacker varnarmaður Þýskalands mun leika sinn 100. landsleik fyrir þjóð sína þegar Þýskaland mætir Gana klukkan 19 í kvöld í heimsmeistarakeppninni í Brasilíu í fótbolta.

Varnarmaðurinn öflugi verður þar með fimmti leikmaður þýska hópsins sem nær þeim merka áfanga að leika 100 leiki fyrir þjóð sína.

Mertesacker er ekki orðinn þrítugur en gríðarlega reyndur. Reynsla er einmitt eitt af því sem varð Þýskalandi að falli í undanúrslitum HM 2010 í Suður-Afríku þegar liðið tapaði fyrir Spáni. Reynslan ætti ekki að vera vandamál nú.

Miroslav Klose, Lukas Podolski, Philipp Lahm og Bastian Schweinsteiger hafa allir leikið yfir 100 leiki fyrir Þýskaland en að auki hafa lykilmenn Þýskalands kynnst sigurtilfinningunni utan heimalandsins með félagsliðum sínum.

Bayern Munchen vann Meistaradeildina 2013 með fjölda landsliðsmanna í lykilhlutverkum. Í ár vann Sami Khedira þessa bestu deild Evrópu með Real Madrid og Podolski og Mesut Özil unnu enska bikarinn með Arsenal.

Aldurinn er líka með þýska liðinu. Aðeins Philipp Lahm er eldri en þrítugur af þeim leikmönnum sem byrjuðu í stórsigrinum á Portúgal í fyrstu umferðinni.

Yngstur var Mario Götze, 22 ára gamall, en þrátt fyrir ungan aldur hefur hann þrisvar verið í sigurliði þýsku deildarkeppninnar.

Þýskaland ætti að hafa lært af tapleikjunum í undanúrslitum á HM 2010 og EM 2012 en svo er spurning hvernig hitinn fer í liðið þegar lengra er komið í keppninni.