Skýrari skilaboð vegna marklínutækninnar

Fulltrúar Alþjóðaknattspyrnusambandsins, FIFA, hafa lofað að skerpa á starfssemi marklínutækninnar eftir rugling í leik Frakklands og Hondúras.

Mark Karim Benzema var dæmt gilt eftir að marklínutæknin sýndi að boltinn hafi farið allur yfir línuna en Frakkar unnu að lokum leikinn, 3-0.

Benzema skaut fyrst í stöng en boltinn fór svo af markverði Hondúras, Noel Valladares, og yfir marklínuna.

Endursýningar marklínutækninnar sýndu hins vegar boltann fyrst eftir að hann skall í stönginni með þeim skilaboðum að ekki væri um mark að ræða. Skilaboðin breyttust hins vegar þegar boltinn hafði breytt um stefnu á Valladares og farið yfir línuna.

„Það voru engin mistök gerð en við munum núna breyta starfsreglunum þannig að áhorfendur sjá skilaboð búnaðarins ef um mark er að ræða,“ sagði Delia Fischer, talsmaður FIFA.

„Þetta var óvenjulegt ástand í þessum leik þar sem boltinn hafnaði fyrst í innanverðri stönginni og stefndi í burtu frá markinu áður en boltinn fór í markvörðinn og yfir línuna.“