Stríðni systkina áhættuþáttur

Börn sem lenda reglulega í því að vera strítt af systkinum sínum gætu átt það á hættu að verða þunglynd þegar þau verða eldri. Þetta kemur fram í niðurstöðum rannsóknar við Oxford-háskóla.

Um sjö þúsund tólf ára börn voru spurð hvort systkini þeirra hefðu sagt eitthvað særandi við þau eða lamið þau. Þegar börnin voru orðin átján ára voru þau spurð út í geðheilsu sína.

Þau 786 börn sem höfðu lent illa í systkinum sínum voru tvöfalt líklegri en önnur börn til að þjást af þunglyndi, að því er segir í frétt BBC.