Síðustu sjónvarpskappræður Salmonds og Darlings í kvöld

Framtíð Skotlands verður til umfjöllunar í sjónvarpskappræðum Alex Salmond, forsætisráðherra skosku heimastjórnarinnar og helsta leiðtoga skoskra sjálfstæðissinna, og Alistair Darling, leiðtoga skoskra sambandssinna, sem fram fara í kvöld.

Kappræðurnar eru þær síðustu milli leiðtoganna fyrir kosningarnar um mögulegt sjálfstæði Skotlands sem fram fara þann 18. september. Kappræðunum verður sjónvarpað beint í Bretlandi.

Skoðanakannanir benda allar til þess að sambandssinnar muni hafa betur, þar sem í kringum 57 prósent styðja áframhaldandi samband við Breta, en um 43 prósent eru fylgjandi sjálfstæði.

Í frétt Reuters segir að kappræðurnar muni að mestu snúast um þrjú atriði. Ef og hvernig sjálfstætt Skotland geti haldið í breska pundið sem gjaldmiðil, hve mikla olíu er að finna í Norðursjó og hvort heilbrigðiskerfi Skota væri betur sett í sjálfstæðu ríki Skotlands.

Fyrri sjónvarpskappræður þeirra Salmond og Darling fóru fram þann 5. ágúst síðastliðinn þar sem stjórnmálaskýrendur sögðu Darling hafa tekist betur til, og Salmond mistekist að svara spurningum um gjaldeyrismál með sannfærandi hætti.

Hafi Salmond mistekist að svara því til hver varaáætlun Salmonds væri ef breska ríkisstjórnin myndi hafna því að deila breska pundinu formlega með sjálfstæðu Skotlandi. Þrír stærstu flokkarnir í Bretlandi hafa allir hafnað slíku fyrirkomulagi, þó að Salmond segist búast við að afstaða þeirra breytist, kjósi Skotar með sjálfstæði.