Stórfelld náttúruspjöll innan Friðlands að fjallabaki

Stórfelld náttúruspjöll voru unnin innan Friðlands að fjallabaki með utanvegaakstri nú fyrir helgina. Um er að ræða svæði við Löðmundarvatn, skammt frá Landmannahelli og er talið að skemmdirnar hafi verið unnar á milli 19. og 21. ágúst. Ingibjörg Eiríksdóttir, svæðalandvörður Umhverfisstofnunar á Suðurlandi, kom að þeim og segir þær mjög umfangsmiklar.

„Þetta er bara skelfilegt, ef maður á einhver orð yfir svona lagað. Þetta er svona hringspól sem maður sér stundum á Sprengisandi og víðar á söndum. Það er auðvitað nógu slæmt á slíkum stöðum en þarna er þetta að gerast á grónu landi sem maður er orðlaus yfir,“ segir Ingibjörg.

Lögreglan á Hvolsvelli biður hugsanleg vitni að hafa samband í síma 4884110 eða á netfangið hvolsvollur@logreglan.is.

Hafið þið einhverja hugmynd um hverjir voru þarna að verki?

„Eins og staðan er núna vitum við ekkert nema að þarna var um stóra bifreið eða stórar bifreiðar að ræða, annað hvort breytta eða mjög stóra jeppa,“ segir Magnús Ragnarsson, lögreglumaður á Hvolsvelli.

Hann segir augljóslega um viljaverk að ræða. „Þarna var ekki verið að fara á einhvern ákveðinn stað til að fá útsýni yfir svæðið, eins og oft er, heldur er verið að aka þarna í hringi og spæna upp landið þannig að ásetningurinn er til staðar.“

Utanvegaakstur er lögbrot og lögreglan ákveður sektarupphæðir, frá tíu þúsund krónum upp í 500 þúsund. Fólk sem keyrði upp í vesturhlíð Tjörvafells um helgina þurfti að greiða 150 þúsund krónur en hinn eða hinir ábyrgu við Löðmundarvatn gætu átt von á þyngstu viðurlögum, eða hálfrar milljón króna sekt.

Afar mikið hefur verið um utanvegaakstur innan Friðlandsins í sumar og mörg mál hafa ratað til lögreglunnar. „Þetta er ekki bara lögbrot heldur er verið að skemma náttúruna og oft eitthvað sem er mjög erfitt að endurheimta,“ segir Magnús.