Sorp gefur til kynna komu betri tíma

samfélagsmál Ef litið er á það magn sem kemur til endurvinnslustöðva Sorpu má leiða að því líkum að neysla landans sé heldur að aukast eftir mögur ár.

„Heildarmagn inn á Endurvinnslustöðvar Sorpu er ekki komið í sömu hæðir og fyrir hrun en við stefnum í þá átt,“ segir Guðmundur Tryggvi Ólafsson, rekstrarstjóri endurvinnslustöðva Sorpu. „Það sem af er árinu fjölgar heimsóknum um ríflega sjö prósent og magn úrgangs að sama skapi. Það er ekki hægt að horfa fram hjá þeim möguleika að þetta séu merki um aukinn kaupmátt og aukinn áhuga almennings á umhverfismálum.“

Hann bætir við að frá því að sveitarfélögin tóku blátunnuna í notkun hafi það skilað sér í frekari þátttöku almennings í pappírsflokkun og síðan leitt til aukinnar flokkunar annarra endurvinnsluefna. Hann segir enn fremur að meira af hlutum, fatnaði og raftækjum skili sér til Góða hirðisins og söfnunar Rauða krossins en á mögru árunum fyrst eftir hrun.

Ingþór Guðmundsson, stöðvarstjóri endurvinnslunnar hjá Gámaþjónustunni, segir að þar hafi menn orðið varir við að neysla landsmanna sé að aukast. Aðspurður hvort hún sé að ná sömu hæðum og fyrir hrun svarar hann: „Nei, almáttugur. Það er ekki svo. Þá var svo svakaleg sóun sem ég vonast ekki til að sjá aftur. Nú er þetta bara að komast í eðlilegt horf.“

Hann segir enn fremur að fólk sé farið að endurvinna mun meira en áður og nánast öllu sem er endurvinnanlegt er komið í endurvinnslu.

Þegar kaupgetan þvarr hjá landanum við hrunið sáust þess glöggt merki í Urðunarstöðinni á Álfsnesi. Þar varð 35 prósenta samdráttur á magninu sem þangað kom þar frá árinu 2008 til 2010. Varð þetta til þess að stytta varð vinnutíma starfsmanna á Álfsnesi um eina og hálfa klukkustund.

Á þessu ári virðist ætla að verða samdráttur á magninu sem þangað berst en á því eru aðrar skýringar en minni neysla. „Það er annars vegar vegna aukinnar endurvinnslu á svæðinu, einkum þá á pappír og pappa, vegna blátunnuvæðingarinnar,“ segir Bjarni Gnýr Hjarðar, yfirverkfræðingur hjá Sorpu. „Og hins vegar vegna eigendasamkomulags sveitarfélaganna sem standa að Sorpu, þess efnis að hætta eigi móttöku á hluta af lífrænum úrgangi samkvæmt sérstakri áætlun fram að gangsetningu gas- og jarðgerðarstöðvar.“