Af Suðurnesjum í æðstu embætti á höfuðborgarsvæðinu

Alda Hrönn Jóhannsdóttir er nýr aðstoðarlögreglustjóri hjá Lögreglunni á höfuðborgarsvæðinu. Alda, sem hefur undanfarin ár verið yfirlögfræðingur hjá lögreglunni á Suðurnesjum, lýkur verkefnum sínum suður með sjó út mánuðinn. Hún er settur aðstoðarlögreglustjóri til eins árs.

Alda þekkir vel til löggæslumála, en hún hefur starfað innan lögreglunnar frá árinu 1999 og var m.a. settur saksóknari efnahagsbrota um eins árs skeið. Alda, sem lauk lögfræðiprófi frá HÍ 2001, vann líka hjá LRH um tíma og þekkir því vel til embættisins. Á meðal verkefna hennar hjá LRH verður að hafa yfirumsjón með innleiðingu á nýju verklagi vegna heimilisofbeldismála, mansali og útlendingamála.

Alda verður því hægri hönd Sigríðar Bjarkar Guðjónsdóttur, nýskipaðs lögreglustjóra á höfuðborgarsvæðinu, sem tók við embættinu 1. september. Sigríður hefur gegnt stöðu lögreglustjóra á Suðurnesjum frá árinu 2009. Þá sótti hún um stöðuna ásamt fjórum öðrum, einn umsækjanda var einmitt Alda Hrönn.

Lögreglukonurnar hafa hlotið lof fyrir störf sín suður með sjó og skipa æðstu embætti hjá lögreglunni á höfuðborgarsvæðinu. Sigríður er fyrsta konan til að gegna embætti lögreglustjóra á höfuðborgarsvæðinu en töluverð umræða hefur verið um lítinn hlut kvenna í æðstu stöðum innan lögreglunnar undanfarin misseri.

Þá hefur Kristján Ingi Kristjánsson verið skipaður nýr aðstoðaryfirlögregluþjónn hjá LRH og yfirmaður R-3, deildar sem rannsakar m.a. kynferðisbrot, heimilisofbeldi og manndráp.

Kristján, sem lauk námi frá Lögregluskóla ríkisins 1988, hefur mikla reynslu sem lögreglumaður. Hann hóf störf hjá lögreglunni í Reykjavík 1986 og var síðar í ávana- og fíkniefnadeild þar sem hann gegndi starfi lögreglufulltrúa um tíma.

Kristján var í ofbeldisbrotadeild lögreglunnar í Reykjavík um árabil, en hefur starfað í kynferðisbrotadeild LRH frá árinu 2007. Hann hefur starfað í samninganefnd sérsveitar ríkislögreglustjóra.