Sigríður Björk Guðjónsdóttir verður lögreglustjóri höfuðborgarsvæðisins

Lögreglustjórum verður fækkað úr fimmtán í níu með nýjum lögum um lögregluumdæmi. Hanna Birna Kristjánsdóttir hefur skipað Sigríði Björk Guðjónsdóttur í embætti lögreglustjóra á höfuðborgarsvæðinu.

Sigríður er fyrsta konan sem gegnir embættinu, en hún mun flytjast frá embættinu á Suðurnesjum þar sem hún hefur verið frá árinu 2009. Hún var aðstoðarríkislögreglustjóri á árunum 2007-2008, sýslumaður á Ísafirði 2002-2006 og þar áður skattstjóri Vestfjarðaumdæmis.

Þetta kemur fram í tilkynningu frá innanríkisráðuneytinu.

Ráðherra tilkynnti einnig um skipan í embætti lögreglustjóra í nýjum umdæmum. Umdæmum mun fækka úr fimmtán í níu um næstu áramót.

Lögreglustjóri á Suðurlandi: Kjartan Þorkelsson.

Lögreglustjóri á Austurlandi: Inger L. Jónsdóttir.

Lögreglustjóri á Norðurlandi eystra: Halla Bergþóra Björnsdóttir.

Lögreglustjóri á Norðurlandi vestra: Páll Björnsson.

Lögreglustjóri á Vesturlandi: Úlfar Lúðvíksson.

Lögreglustjóri á höfuðborgarsvæðinu: Sigríður Björk Guðjónsdóttir.

Lögreglustjóri á Suðurnesjum: Ólafur Helgi Kjartansson.



„Efling löggæslunnar hefur verið eitt af forgangsverkefnum ríkisstjórnarinnar en með þessum breytingum verða til færri en um leið öflugri embætti. Minni yfirbygging, fjölbreyttur og sterkur hópur löggæslufólks, tækniframfarir og bættur búnaður lögreglu stuðlar að því að starfsemi lögreglunnar innan umdæma verði skipulögð með markvissari hætti,“ segir Hanna Birna Kristjánsdóttir, innanríkisáðherra, í tilkynningunni.

„Ég býð nýskipaða lögreglustjóra velkomna til starfa og er þess fullviss að þeir muni leggja sitt af mörkum við að tryggja öryggi almennings og öfluga þjónustu á hverjum stað.“