Aron og félagar sekúndum frá 16 liða úrslitunum - Portúgal jafnaði í blálokin

Aron Jóhannsson fékk ekki að spila þegar félagar hans í bandaríska landsliðinu voru hársbreidd frá því að tryggja sér sæti í sextán liða úrslitum á HM í fótbolta í Brasilíu eftir 2-2 jafntefli við Portúgal í kvöld í hörkuspennandi leik í hitanum í Manaus í útjarði Amazon-frumskógarins.

Clint Dempsey hélt að hann hefði skorað sigurmark bandaríska landsliðsins níu mínútum fyrir leikslok en Varela tryggði Portúgal jafntefli á fimmtu mínútu í uppbótartíma með einni af síðustu snertingu leiksins. Bandaríska liðið hefði tryggt sér sæti í sextán liða úrslitunum með sigri og sent um leið Portúgala heim.

Þetta var síðasti leikurinn í annarri umferð riðlakeppninnar á HM í fótbolta í Brasilíu en lokaumferðin fer síðan fram í vikunni. Bandaríkjamenn og Þjóðverjar eru með fjögur stig og nægir báðum jafntefli í innbyrðisleik sínum í lokaumferðinni til þess að tryggja sér sæti í sextán liða úrslitunum. Gana og Portúgal hafa eitt stig hvort.

Aron Jóhannsson var á varamannabekknum þrátt fyrir að Jozy Altidore væri ekki leikfær en Aron kom inná fyrir hann í fyrsta leiknum. Jürgen Klinsmann, þjálfari bandaríska landsliðsins, setti Graham Zusi inn í liðið fyrir Altidore og Clint Dempsey fór þess í stað upp á topp.

Bandaríska liðið fékk draumabyrjun í fyrsta leik en matraðarbyrjun í kvöld þegar Nani kom Portúgal í 1-0 strax á fimmtu mínútu eftir misheppnaða hreinsun frá varnarmanninum Geoff Cameron.  

Portúgal fékk færi til að bæta við undir lok fyrri hálfleiksins en Tim Howard varði þá frábærlega í markinu, svo sannarlega ein af flottustu markvörslum mótsins. Bandaríkjamaðurinn Fabian Johnson átti einnig gott skot í hálfleiknum sem fór rétt framhjá. Staðan var því enn 1-0 í hálfleik.

Michael Bradley fékk algjört dauðafæri á 55. mínútu eftir flottan undirbúning Fabian Johnson en Ricardo Costa bjargaði á magnaðan hátt á marklínunni þegar allt markið blasti við Bradley.

Bandaríkjamenn voru hinsvegar ekki hættir og Jermaine Jones jafnaði á 64. mínútu með flottu langskoti eftir að hann fékk alltof mikinn tíma til að athafna sig fyrir framan vítateiginn. Frábært mark.

Clint Dempsey kom Bandaríkjamönnum í 2-1 á 81. mínútu eftir sendingu frá Graham Zusi en varnarmenn portúgalska liðsins spiluðu hann réttstæðan og hann ýtti boltanum yfir marklínuna með brjótskassanum.

Bandaríska liðið fagnaði markinu með eftirminnilegum hætti og það er augljóslega frábær andi í hópnum. Aron tók þátt í fögnuðinum og var ekkert að svekkja sig yfir því að fá ekki að spila.

Portúgalar voru því á leiðinni heim þar til að Varela náði að jafna metin á 95. mínútu með flottum skalla eftir frábæra fyrirgjöf frá Cristiano Ronaldo. Portúgalar eru því enn á lífi þótt að staðan sé ekki góð.