Kompany: Getum ekki bara treyst á Lukaku

Belgíski varnarmaðurinn Vincent Kompany segir ekki vera sanngjarnt að setja of mikla pressu á Romelu Lukaku á heimsmeistarakeppninni í fótbolta sem fram fer í Brasilíu.

Belgía mætir Rússlandi í dag klukkan 16 og segir Kompany að reynslumeiri leikmenn liðsins þurfi að stíga upp.

„Hann er bara 21 árs gamall og á öruggleg tvær HM keppnir eftir, ef ekki fleiri,“ sagði Kompany. „Það er engin pressa á honum.

„Ef hann stendur sig verðum við ánægðir en það sem mestu skiptir er að frammistaða hans hjálpi liðinu.

„Hann er mjög hæfileikaríkur en við getum ekki treyst á að 21 árs gamall krakki sjái um þetta fyrir okkur á HM. Það eru eldri leikmenn í liðinu sem eiga að axla meiri ábyrgð,“ sagði Kompany.

Belgía lagði Alsír í fyrstu umferðinni án þess að leika sinn besta leik og getur tryggt sér sæti í 16 liða úrslitum í dag með sigri.