Komið að Cole að setjast í aftursætið

Ashley Cole hefur átt vinstri bakvarðarstöðuna hjá enska landsliðinu undanfarin ár en Roy Hodgson, landsliðsþjálfari Englands, hefur gefið í skyn að hans tími þar sé svo gott sem liðinn.

"Í mörg ár hafa menn þurft að fylgjast með honum spila. Nú er komið að honum að setjast í aftursætið," sagði Hodgson.

Cole hefur ekki átt fast sæti í liði Chelsea á þessari leiktíð og svo er Leighton Baines að spila vel fyrir Everton. Baines verður því væntanlega byrjunarliðsmaður á HM miðað við núverandi stöðu.

"Við vitum hvað hann getur og ég veit að hann heldur sér alltaf í formi. Ég myndi ekki afskrifa hann þó svo hann sé ekki alltaf að spila. Hann þarf samt að sætta sig við að það er samkeppni um hans stöðu eins og aðrar."