Innlent

Noah er „viðbjóður“ að mati guðfræðings

Jakob Bjarnar skrifar
Sverrir og Davíð Þór tjá sig um Noah en sá síðarnefndi sparar sig hvergi í að úthúða myndinni: „Þetta er hræðileg mynd, ekki sjá hana, ekki eyða hálfri mínútu af æfi ykkar í að sitja undir þessum viðbjóði."
Sverrir og Davíð Þór tjá sig um Noah en sá síðarnefndi sparar sig hvergi í að úthúða myndinni: „Þetta er hræðileg mynd, ekki sjá hana, ekki eyða hálfri mínútu af æfi ykkar í að sitja undir þessum viðbjóði."
Útvarpsþátturinn Reykjavík síðdegis bauð Davíð Þór Jónssyni guðfræðingi og Sverri Agnarssyni, formanni félags múslima á Íslandi, á hina umdeildu kvikmynd Noah eftir Darren Aronofsky, sem tekin er að verulegu leyti til á Íslandi og fjallar um sögu Nóa úr Biblíunni. Þeir voru þá fengnir til að segja sína skoðun á myndinni og óhætt er að segja að þeir hafi hvergi dregið af sér í kvikmyndarýni sinni. Davíð Þór var verulega afgerandi og tætti myndina í sig.

Davíð segir greinilegt að handritshöfundar hafa lagst í töluverðar pælingar á biblíunni og því tímabili sem hún tekur fyrir, guðspekilegar hugrenningar og rekur það í nokkuð ítarlegu máli. Sverrir segir þetta ekkert eiga skylt við frásögnina í Kóraninum, en þar var Nói fyrir flóðinu en ekki allt mannkyn. Hlutverk spámanna gæti farið fyrir brjóstið á trúuðum múslímum. En hann hafi ekki mjög gaman að stórslysamyndum og sé ekki kvikmyndafræðingur.

En, þá setur Davíð Þór á mikla ræðu, segir að úr þessu verði hræðilega löng  og leiðinleg mynd sem er klisja ofan á klisju ofan á klisju. „Ég í sjálfu sér stend í þakkarskuld við ykkur fyrir að hafa boðið mér á þessa mynd því þá þurfti ég ekki að eyða mínum eigin peningum í að sjá þennan viðbjóð sem ég hefði hugsanlega geta freistast til að gera. En, um leið var ég farinn að bölva ykkur í hljóði í hléi því mér fannst ég einhvern veginn skulda ykkur að afplána alla myndina sem ég hefði ekki gert ef ég hefði borgað mig sjálfur inn á þennan óþverra. Þetta er hræðileg mynd, ekki sjá hana, ekki eyða hálfri mínútu af æfi ykkar í að sitja undir þessum viðbjóði. Þetta er bara leiðinlegt, aðallega. Þetta er illa gert, þetta er vanhugsað, þetta er banalt, þetta er lapþunnt og heimskulegt. Að vissu leyti má segja að þetta útskýri hvernig komið er fyrir mannkyninu í dag vegna þess að synir Nóa eru slíkir aumingjar og mannleysur að ef þetta eru forfeður mannkyns; Guð hjálpi okkur.“

Kvikmyndagerðarmenn og áhugamenn um kvikmyndir og Biblíuna ættu ekki að láta reiðilestur Davíðs Þórs og athugasemdir Sverris fram hjá sér fara.




Fleiri fréttir

Sjá meira


×