Hefur sparað 560 túra í gegnum miðbæinn

„Þetta er frábært mál og hefur reynst gæfuspor að þessari starfsemi var komið á fót. Það skipti verulegu máli þegar það var kynnt fyrir okkur hvernig mögulegt væri að landa beint í skipin og minnka gámaflutninginn í gegnum þessi viðkvæmu svæði á daginn,“ segir Páll Hjaltason, formaður skipulagsráðs Reykjavíkur, um reynsluna af Ísbirninum, nýrri frystigeymslu HB Granda á Norðurgarði.

Páll segir um forsögu málsins að raddir hafi verið uppi um að staðsetning hússins væri mjög áberandi, gengt tónlistarhúsinu Hörpu. Það ætti jafnvel heima annars staðar. „Þetta er auðvitað bara ísskápur sem kallar ekki beint á arkitektúr, en hins vegar hafa verið sett upp lisaverk við hafnarmynnið og í samhengi við Hörpuna þá sparast keyrsla þessara stóru bíla framhjá tónlistarhöllinni á stað sem fjölmargir sækja daglega, segir Páll. „Þetta var mjög borgarvæn aðgerð.“

Fyrirtækið Landar ehf. annast löndunarþjónustu fyrir HB Granda. Frá því að frystigeymslan var tekin í notkun á sjómannadaginn 2. júní í fyrra hefur ferðum stórra flutningabíla fækkað um 560 í gegnum miðbæinn, en það jafngildir flutningum á um 7.000 tonnum með frostnar sjávarafurðir,“ að sögn Reynis Daníelssonar, framkvæmdastjóra. Hann segir að fyrir tilkomu Ísbjarnarins hafi flutningabílar þurft að aka með tóma gáma frá Sundahöfn niður á Granda; Sæbrautina, framhjá Hörpu og í gegnum Geirsgötu og Mýrargötu, þar sem er mikið mannlíf hvern dag - og svo aftur sömu leið til baka fulllestaðir.

„Þetta hefur sparað 560 túra í gegnum miðbæinn, sem er mikið. Þetta skiptir máli þegar haft er í huga að farið er um þröngar götur á þessari leið - og oft mikið af fólki,“ segir Reynir.

En málið lítur að fleiri hlutum en bættri mannvist í miðborginni. Með Ísbirninum hefur meðferð viðkvæmrar vöru, sem fryst sjávarfang er, gjörbreyst til batnaðar. „Varan fer betur þegar hún er færð beint frá skipi og í frost, þar sem hún bíður útskipunar. Við löndun er þetta 30 metrar beint í hús þannig að hitastigið helst í vörunni, fyrir utan það að varan verður ekki fyrir óþarfa hnjaski í flutningum,“ segir Reynir.