„Við erum orðin öskureið“

Viðræðum grunnskólakennara og sveitarfélaganna var slitið um klukkan sex í morgun eftir 18 klukkustunda samningalotu og kennarar fjölmenntu á Ingólfstorg klukkan tíu. Þar var nokkur hiti í fundarmönnum og hafði Ásdís Ólafsdóttir, íþróttakennari í Snælandsskóla, þetta að segja:

„Við erum orðin öskureið. Foreldrar ættu að berjast með okkur, fyrir skólana. Við kennarar viljum fá leiðréttingu, núna. Ég er búin að vera kennari í 44 ár og launin mín ná ekki 400 þúsund krónum. Þetta eru skítalaun,“ sagði Ásdís.

Sest var aftur að samningaborðinu um þrjúleytið í dag en ekkert nýtt liggur fyrir.

Svo þið eruð engu nær því að semja en í morgun?

„Á meðan maður fer ekki aftur á bak má eiginlega segja að maður fari áfram,“ segir Ólafur Loftsson, formaður Félags grunnskólakennara. „En við erum ekki komin á þann stað að loka þessu.“

Næsta vinnustöðvun er fyrirhuguð á miðvikudaginn og Ólafur segir allt kapp lagt á að semja sem fyrst. Hann segir heiðarleika ríkja í samingaviðræðunum.

„Það hefur stundum skort traust á milli okkar; þ.e. ekki á milli samninganefndanna sem slíkra en á milli stéttarinnar og sveitastjórnanna og þetta lítur heldur betur út en það hefur gert, það verður að segjast eins og er.“