Segir landgræðslustjóra ábyrgan fyrir vísvitandi utanvegaakstri

Starfsmaður Landgræðslunnar verður kallaður fyrir yfirstjórn í dag og honum veitt tiltal vegna utanvegaaksturs. Landgræðslan harmar atvikið í samtali við Vísi og segist landgræðslustjóri ekki skilja hvernig svona geti gerst. Utanvegaaksturinn átti sér stað á Kaldbak á Rangárvöllum eða í næsta nágrennni við höfuðstöðvar Landgræðslunnar. Bíll Landgræðslunnar kolfestist í mýri en starfsmaðurinn var við GPS-mælingar á svæðinu.

„Starfsmaðurinn verður kallaður fyrir yfirstjórn Landgræðslunnar í dag og fær tiltal en mun þó halda vinnu sinni. Þetta gerðist í Landi Víkingslækjar, sem er ríkisjörð á forræði Landgræðslunnar en ábúendurnir á Kaldbak hafa notað hluta af jörðinni, sem beitiland í algjöru leyfisleysi“, segir Sveinn Runólfsson, landgræðslustjóri hjá Landgræðslu ríkisins vegna kæru sem stofnunin fékk á sig í gær vegna utanvegaaksturs.

Segir landgræðslustjóra hafa yndi af hótunarbréfum

„Já, við kærðum Landgræðsluna og fengum lögregluna á Hvolsvelli til að koma hingað og taka skýrslu af ökumanninum. Mér er sagt að hann hafi litlar skýringar getað gefið á framferði sínu“, segir Sigríður Heiðmundsdóttir, bóndi á Kaldbak á Rangárvöllum. Bærinn er í næsta nágrenni við höfuðstöðvar Landgræðslunnar í Gunnarsholti.

Sigríður segir að þetta sé ekki í fyrsta skipti sem bíll frá Landgræðslunni valdi skemmdum á svæðinu, áður hafi verið ekið yfir birki og aspir sem hún var að gróðursetja.

„Bílstjórinn í gær hefur líklega verið sendur af landgræðslustjóra, sem hefur sérstakt yndi af að senda okkur hótunarbréf af minnsta tilefni og nú hefur honum dottið þetta í hug“, bætir Sigríður við.

Sveinn Runólfsson vísar þessum umælum til föðurhúsanna og segir ekkert hæft í þeim.