Ferðamenn fastir á heiðum

Erlendir ferðamenn lentu í vandræðum þegar þeir festu bíl sinn á Kaldadal ofan Húsafells í dag. Björgunarsveitin OK í Borgarfirði er nú á leið til aðstoðar fólkinu. Ekkert amar að hjá fólkinu í bílnum en það hafði farið inn á fjallveg sem er merktur ófær hjá Vegagerðinni.

Samkvæmt tilkynningu frá Landsbjörgu er Björgunarsveitin Húnar á Hvammstanga er einnig á leið til aðstoðar ferðamönnum, innlendum sem fest hafa bíl sinn á Arnarvatnsheiði, austan við Arnarvatn.

Í þeim bíl eru þrír sem eru orðnir slæptir og blautir eftir nokkra klukkustunda tilraunir til að losa bíl sinn. Samkvæmt tilkynningunni má reikna með að það muni taka björgunarsveitarmenn langt fram á kvöld eða nótt að koma fólkinu til byggða.

„Aðstæður á heiðum og hálendi landsins er þannig að nauðsynlegt er að vera á mjög öflugum jeppum og þá að minnsta kosti alltaf tveir saman.“